Ох, і сеяла Ульяніца лянок, Ох, і сеяла Сяргееўна лянок Прыпеў: Ох, сэрца лянок Мая радасць ты, лянок, Ды бялюсенькі кужалёк. Ох, палола Ульяніца лянок, Ох, палола Сяргееўна лянок Прыпеў. Ох, і рвала Ульяніца лянок, Ох, і слала Сяргееўна лянок. Прыпеў. Ох, і мяла Ульяніца лянок, Ох, і прала Сяргееўна лянок. Прыпеў. Ох, і ткала Ульяніца лянок, Ох, і шыла Сяргееўна лянок. Прыпеў. Ой, надзела Ульяніца лянок, Ой, прыйшла да суседа ў садок Прыпеу, 2р. --- Беларуская народная песня, апрацоўка Леаніда Смялкоўскага --- Вольга Паўлаўна Шутава (дзявочае прозвішча Цішук) нарадзілася 15 лютага 1944 года ў сялянскай сям'і ў вёсцы Загародная Камянецкага раёна Брэсцкай вобласці. Талентам-самародкам прыйшла ў беларускае мастацтва. З 1968 па 1996 гады яна з’яўлялася салісткай Беларускай дзяржаўнай філармоніі. У 1972 годзе скончыла Усерасійскую творчую майстэрню эстраднага мастацтва ў Маскве. Вучылася ў класе заслужанай артысткі БССР, народнай артысткі РСФСР Ірмы Пятроўны Яунзем (1897–1975). У 1973 годзе Вольга Шутава атрымала ганаровае званне заслужанай артысткі БССР. Спявачке ўласціва беларуская народная манера выканання, выдатнае данясенне тэксту, задушэўнасць у перадачы эмацыянальнага зместу песень. У яе рэпертуары былі беларускія народныя песні "Пасаджу рабіну ў полі", "Чаму калінка?", "Дубочак зялёненькі", "Іванка маладзенькі" i iншыя. Многія з песень яна пераняла ад маці і аднавяскоўцаў. Таксама выконвала творы беларускіх кампазітараў І. Лучанка, У. Будніка, Л. Захлеўнага, В. Цямнова, А. Чыркуна і іншых: "Я люблю сваю зямлю", "Бабіна доля", "Валгаградская бярозка", "Мой родны кут". Яшчэ выконвала больш за 50 песень розных народаў, напрыклад, спявала на польскай мове "Пайшла Каралінка", "Шла дзявочка да лясочка", на іспанскай – мексіканскую "Сандунга". Любоў – галоўная тэма Вольгі Шутавай, а галоўны адрас яе любові – Радзіма. Галоўны ж адрас яе песні – чалавечае сэрца, адкрытае праўдзе і хараству. Вольга Паўлаўна знялася ў кароткай музычнай стужцы "Беларусь мая, сінявокая", дзе выканала невялічкую ролю і праспявала "Мяцеліцу". Потым у таго ж рэжысёра Юрыя Мікалаевіча Цвяткова (1941–2011) знялася ў мастацкім фільме "Спяшайся будаваць дом" (1970). У 1977 годзе выйшла грампласцiнка "Поёт Ольга Шутова. Белорусские и русские песни" https://youtu.be/OABocO5tp24, дзе запісаны чатыры вакальныя творы ў суправаджэнні інструментальнага ансамбля Беларускага радыё пад кіраўніцтвам Л. Смялкоўскага. Спявала для ўдзельнікаў і гасцей "Алімпіяды-80" у Маскве. Працавала ў эстрадным калектыве "Беларускі сувенір" Белдзяржфілармоніі, якім кіраваў кампазітар і канцэртмайстар (баяніст) Леанід Барысавіч Шурман, другі муж спявачкі. З гэтым калектывам Вольга Шутава шмат гастраліравала па рэспубліках СССР, а таксама за мяжой (ГДР, ФРГ, Аўстрыя, ЗША, Італія, Калумбія, Японія, Афганістан, Нарвегія, Фінляндыя і інш.). Жыла ў Мінску з маці і сынам Вадзімам. У вольны час захаплялася вязаннем: кофты, сукенкі, шкарпэткі для сябе і сям’і. Любіла родную вёску, прыязджала на Камянеччыну пры любой магчымасці, наведвала брата, выступала перад землякамі. Вольга Паўлаўна Шутава памерла 26 лістапада 1999 года. крынiца: kb.brl.by