Speach on Candlemas (Feast of the Presentation of Jesus Christ). Sunday, February 14, 2021. Cairo Мір Вам, Браты й Сёстры! У гэты Сьвяты Дзень Стрэчаньня, што надыходзіць, я зьвяртаюся да Вас з Храму Сьвятых Пакутнікаў Сергія й Бахуса на месцы,дзе спынялася Сьвятая Сям'я падчас уцёкаў у Эгіпет. Царква прысьвяціла гэты дзень, 40-ы пасьля Божага Нараджэньня, памяці ачышчэньня Марыі й прынясеньня Немаўлята Хрыста ў Храм Ерусалімскі, дзе Яго сустрэў старац Сімяон і Ганна-прарочыца. Сьвята зьявілася ў Хрысьціянстве ў VI ст. на тэрыторыі былой Рымскай імпэрыі й трактуецца, як сваеасаблівая повязь Старога Запавету з Новым. Старац Сімяон-Богапрымаўца перакладаў Стары Запавет. І калі ён дайшоў да прароцтва "Дзева народзіць Збаўцу сьвету", то падумаў,што гэта памылка і хацеў выправіць на "жанчына народзіць Збаўцу сьвету", але Бог сказаў,што Сімяон не памрэ,покуль на ўласныя вочы не пераканаецца ў праўдзівасьці гэтых радкоў. Гэткім чынам, стрэчаньне (сустрэча) старца Сімяона зь Немаўлятам Хрыстом - сымбалічная сувязь Старога Запавету з Новым! У царкве пасьля Водпусту чыну асьвячэньня сьвятар раздае сьвечкі зь віншаваньнем: "Хрыстос сустракаецца!", а вернікі адказваюць: "У храме Ерусалімскім!" А Хор пяе: Цяпер адпускаеш слугу Свайго, Уладару, Паводле слова Твайго, зь мірам, Бо бачылі вочы мае збаўленьне Тваё, Якое Ты падрыхтаваў перад абліччам усіх людзей, Сьвятло на прасьвятленьне народаў, І славу людзей Тваіх,выбраных! У гэты дзень асьвячаюць воскавыя сьвечкі,якія лічацца сымбалем Хрыста, які прынёс сьвятло вечнай Праўды ўсім народам. Грамніцы (Стреченіе, Candlemas, also Feast of the Presentation of Jesus Christ) - у беларускім народным календары - сьвята арышчэньня з дапамогай агню. Яго адметнасьць - асаблівы чын асьвячэньня стрэчанскіх сьвечак, якія ў народзе называюць грамнічнымі. На думку некаторых дасьледчыкаў, звычай з асьвячэньнем сьвечак у гэты дзень зьвязаны з дахрысьціянскім рымскім культам ачышчэньня й пакаяньня. Лічыцца,што спальваньне сьвечак у гэты дзень дапамагае пры хваробе, ад навальніцы й маланак, адпуджвае ад чалавека нечысьць, ахоўвае ад ведзьмаў і чарадзеяў. Зараз у Беларусі, асабліва апошнія 1/2 гады, шмат зла й гвалту, лукавы са сваімі "воінамі зла"ў чорным і судзілішчамі-сынедрыёнамі "правіць баль". Мажліва, Беларускай Нацыі трэба прайсьці гэты пакутны шлях...шлях ачышчэньня. Хай Бог беражэ ў гэты дзень і надалей Вас і Вашых сваякоў! Амінь.