Сёньня, 7 сакавіка, у першую нядзелю вясны, я зьвяртаюся са словамі падтрымкі да Беларусаў на Бацькаўшчыне, што не скарыліся й у адкрытай ці схаванай форме супрацьстаяць гвалту й несправядлівасьці лукавага рэжыму. Шлях да Свабоды, да адраджэньня Беларускай Нацыі аказаўся не такім хуткім і не такім лёгкім,як хацелася б й падавалася спачатку, улетку 2020 году. Але падобны шлях прайшлі шмат якія эўрапейскія цывілізаваныя (зараз) краіны. Апошнія 2 тыдні рэжым лукашэнкі працягвае рэпрэсыі, перасьлед, суды, якія часам ураджваюць сваёй абсурднасьцю, сюррэалістычнасьцю, асабліва ў дэталях, а менавіта: - застрэленага Гэнадзя Шутава, бацьку 5 дзяцей, "суд" прызнаў вінаватым, а сьведку яго забойства Аляксандру Кардзюкову - даў 10 гадоў калёніі ўзмоцненага рэжыму! - судзяць пэнсыянэрак за чытаньне твораў У.Караткевіча, Я.Купалы, Васіля Віткі, іншых беларускіх аўтараў, у электрацыі! - хворага на анкалёгію інваліда Ўладзімера Малахоўскага зь Віцебска, якому зламалі палец, пырснулі з балёнчыка ў вочы, зараз абвінавацілі ў нападзе й далі 3,5 гады турмы! Акрамя таго варта адзначыць, што: - у гэты час зь 1 сакавіка ўступіў у сілу новы Кодэкс аб адміністрацыйных парушэньнях, які зараз прадугледжвае павелічэньне штрафаў да 5800 беларускіх руб.за,фактычна, рэалізацыю свайго канстытуцыйнага права на выказваньне меркаваньня, а таксама арышт ужо да 30 содняў! Кіроўцам прадугледжана часовае пазбаўленьне правоў на кіраваньне за падачу гукавога сыгналу! - журналістка tut.by Кацярына Барысевіч была асуджана на 1/2 гады калёніі ў справе "0 ‰"! - таксама была заведзена крымінальная справа супраць Праваабарончага Цэнтру "Вясна"; - вынесены прысуд "за чаяваньне" ў Менску; - беларускамоўныя гістарычныя й дзіцячыя часопісы (як і астатнія друкаваныя дэмакратычныя СМІ) зараз нельга набыць празь сетку дзяржаўнага манапаліста "белсоюзпечать". Пры гэтым чарговыя трывожныя сыгналы падае беларуская эканоміка - ўладамі былі замарожаны кошты на сацыяльна-значымыя тавары. Цяжка ўсур'ёз адэкватна успрыняць гэтыя факты... Натуральным сымбалічным тут падаецца адказ міністра замежных спраў Летувы на запыт пракуратуры РБ аб выдачы Сьвятланы Ціханоўскай: "ХУТЧЭЙ ПЕКЛА ЗАМЁРЗЬНЕ, чым мы будзем з вамі супрацоўнічаць!" Заклікаю трымацца духам Беларусаў на Бацькаўшчыне й памятаць: АБУДЖЭНЬНЕ, ВЯСНА - БУДЗЕ! Жыве Беларусь!