Учора, пад час вячэрняга Богаслужэння ў Царкве "Збаўленне" (пасёлак Калодзішчы) Зміцер Марчук натхнёна выканаў адзін з вядомых хрысціянскіх спеваў на словы Артура Вольскага. Артур Вольскі: "МАЎЧЫМ…МАЎЧЫМ… Гасподзь ідзе ў Ерусалім. На дужым аслянятку едзе. Натоўп укленчыў перад ім, а здрада ўжо саспела недзе і ценем крадзецца па следзе… Гасподзь ідзе ў Ерусалім. Натоўп укленчыў перад Ім, крычыць: - Ратуй, магутны Цару!.. Ды, перасмяглая зусім, гара Галгофская ахвяру чакае, як палетак хмару… Гасподзь ідзе ў Ерусалім. Мінула столькі лет і зім, Але спадзеву час не глушыць: па небе, па вадзе, па сушы, праз нашы сэрцы, нашы душы Гасподзь ідзе ў Ерусалім. А вочы слепіць чадны дым, І неба – ў шэрай пацярусе. Гасподзь ідзе ў Ерусалім Па занядбанай Беларусі. А што яна? Маўчыць у скрусе. А мы? І мы – маўчым… Маўчым. Чаму ж “асанна” не крычым?.. Гасподзь ідзе ў Ерусалім!" (Тэкст пададзены паводле выдання "Артур Вольскі. След завірухі. Вершы апошніх гадоў. Мінск. "Беларускі кнігазбор".2000") мк