На працягу чатырох дзён - з 7 па 10 верасня - у Мінску пройдзе больш за 80 культурных, спартыўных, адукацыйных мерапрыемстваў і акцый. Ужо вызначаны і асноўныя гарадскія пляцоўкі - гэта парк Перамогі, Палац спорту, тэрыторыя Верхняга горада і Траецкага прадмесця. У свой юбілей Мінск прыме не толькі паўмарафон, але і Кубак па паветраплаванні, сілавым экстрыме, а таксама фестываль хлеба. Святочную праграму ведае Надзея Сербіненка. Галоўныя святочныя мерапрыемствы намечаны на 9 верасня. З самай раніцы каля Палаца спорту пачнецца канцэртная праграма, разгорнецца кірмаш. А ўвечары ў Вялікім тэатры оперы і балета пройдзе цырымонія "Мінчанін года". Завершыць суботнія мерапрыемствы святочны салют - ён асветліць неба ў 23:00. А на наступную раніцу Мінск ператварыцца ў сталіцу спартыўную. У нядзелю, 10 верасня, стартуе Мінскі паўмарафон. У перадсвяточныя дні Мінск стане і дзелавым цэнтрам. Свой удзел ва ўсіх святочных мерапрыемствах ужо пацвердзілі 17 замежных дэлегацый з 11 краін свету. Запланаваны двухбаковыя сустрэчы паміж кіраўніцтвам гарадоў, а таксама наведванне прамысловых прадпрыемстваў сталіцы. Цалкам акунуцца ў гісторыю Мінска можна будзе 9 верасня. Каля стэлы "Мінск - горад герой” разгорнецца фестываль гістарычнай рэканструкцыі "Мінск старажытны". Гледачы змогуць убачыць сцэны з розных эпох: з XI стагоддзя да Вялікай Айчыннай вайны. Святочная атмасфера на працягу гэтых дзён будзе створана ва ўсіх частках горада. Гэта святы вуліц, канцэртныя праграмы, спартыўныя спаборніцтвы, кірмашы, экскурсіі.