Чырвоныя ружы і наліўныя таматы пад святлодыёдамі. Эксперыментальны праект па вырошчванні агародніны і кветак апрабоўваюць у сталіцы. У гэтым месяцы сабралі першы ўраджай руж, на падыходзе памідоры. А ў Інстытуце батанікі НАН Беларусі пад эфектыўнымі лямпачкамі ўвогуле вырасцілі трапічную лекавую расліну. Моц святла ацаніла Наталля Кезік. Кацярына ў лабараторыі працуе першы год, але пра святлодыёды ведае нямала. Малодшы навуковы супрацоўнік абараніла дыпломную работу па сучасным асвятленні і вырасціла пад лямпачкамі катарантус ружовы - расліну, якую ў фармацэўтыцы выкарыстоўваюць для вытворчасці супрацьанкалагічных прэпаратаў. Расце катарантус у тропіках, а таму ў нашай краіне пакуль гэта сыравіна прывазная. Для кожнай расліны неабходна розная інтэнсіўнасць чырвонага, сіняга і белага святла. Па сваіх тэхналогіях вырасцілі салату, базілік. Летась сабралі ўраджай агуркоў. Зараз працуюць над сумесным праектам з Інстытутам лесу – разводзяць саджанцы дрэў. І па першых назіраннях, карэльская бяроза пад святлодыёдамі вырасла хутчэй у пяць разоў. Тры гады таму з лабараторыі ў цяпліцы пераехалі таматы. Там у якасці эксперыменту на невялікай плошчы размясцілі святлодыёдныя лямпы са спектрам, максімальна набліжаным да натуральнага сонечнага святла. Сёлета эксперыментальны ўраджай памідораў ужо амаль сабралі, а плады пад звычайнымі лямпачкамі чырванець яшчэ не пачалі. Прычым найбольшы эфект бачны менавіта ранняй вясной, калі сонечнага святла не хапае. А каб паспелі плады, раслінам неабходна максімальнае асвятленне. Святлодыёдныя лямпы прыкладна на чвэрць эканомяць электраэнергію. Сёлета навукоўцы паспрабавалі ў цяпліцах вырасціць і капрызныя ружы. Эканамічны эфект відавочны. Якасць ружаў спецыялісты ацэньваюць па некалькіх параметрах – даўжыня кветкі, дыяметр бутона, афарбоўка, стойкасць. Але галоўны крытэрый – колькасць кветак на метры квадратным. І тут, на эксперыментальным участку, гэтую лічбу сёлета ўдалося павялічыць удвая. Ды і на сусветных кветкавых выставах Гран-пры конкурсаў заўсёды дастаюцца раслінам, вырашчаным выключна пад святлодыёдамі. А пакуль беларускія навукоўцы рыхтуюць чарговы эксперымент. Плануюць вырошчваць таматы і ружы пад святлодыёдамі ў асобных цяпліцах. Беларуская распрацоўка ўжо зацікавіла вытворцаў Расіі і Казахстана.