Яны ўжо сталі любімцамі гледачоў у Клецку, а зараз пакараюць не толькі сталічную, але і міжнародную сцэны. Танцавальны калектыў "Каларыт" вярнуўся з міжнароднага конкурсу ў Маскве адразу з двума дыпломамі – другой і трэцяй ступеняў. Паспяховым выступленне стала і для дзіцячага, і для дарослага складу. Антаніна Станкевіч пазнаёмілася з танцорамі, улюбёнымі ў сваю справу. Заняткі ў малодшай групе пачынаюцца з асноў класікі. Самыя маленькія ўдзельнікі калектыву адразу ж запамінаюць вытанчаныя французскія тэрміны і рухі, якія яны абазначаюць. Пасля размінкі - абавязковая расцяжка - усё ж такі танцоры павінны быць гібкімі і пластычнымі. Нягледзячы на даволі сур'ёзныя нагрузкі, ад жадаючых займацца адбою няма. Харэограф з дзесяцігадовым стажам Таццяна Ганчар прызнаецца: як і ўсюды - дзеці розныя, хтосьці больш здольны і таленавіты, хтосьці менш. Аднак ніякіх кастынгаў няма - прымаюць у "каларытную кампанію" ўсіх. Некаторыя вучні звязваюць з танцамі ўсё жыццё, іншыя проста атрымліваюць задавальненне ад працэсу і ад шматлікіх канцэртаў. Тым больш, што выступленняў у калектыву хапае. А гэта самы непрыметны, але незаменны чалавек у калектыве. Памыць, падшыць, выпрасаваць, прывесці ў належны выгляд - работы ў касцюмера перад канцэртам становіцца больш. А справіцца трэба з добрай сотняй сукенак, спадніц і кашуль. Калектыў - жаданыя госці на мясцовай сцэне. Што ні месяц, то канцэрт. Праўда, дамашнія падмосткі для танцораў сталі ўжо цеснымі. Зараз удзельнікі калектыву пакараюць не толькі сталічную, але і міжнародную пляцоўкі. Нядаўна з Масквы прывезлі два дыпломы другой і трэцяй ступеняў. А наперадзе ў танцораў – новыя вяршыні. Зараз яны актыўна рыхтуюцца яшчэ да аднаго міжнароднага конкурсу – у Літве. А ў двух выпускнікоў калектыву – уступныя экзамены. Не выключана, што з маленькай правінцыяльнай студыі пачнецца іх шлях у вялікі свет прафесійнага танца.