Сёння супрацоўнікі МНС адправіліся ў рэйд у Радашковічы і тым самым падтрымалі акцыю "За бяспеку разам". Прыватны сектар лічыцца самым небяспечным. Як прадухіліць бытавыя ўзгаранні, высвятляла Юлія Токар. Спраўнасць дымаходаў, печак і газавых катлоў правяраюць супрацоўнікі МНС. Каб прадухіліць бытавыя ўзгаранні, такія рэйды падчас ацяпляльнага сезона ладзяцца рэгулярна. Шматдзетная маці Наталля Корзік правілам пажарнай бяспекі вучыць і 2-гадовую дачку. Ва ўласным доме жывуць ужо восем гадоў. Гаспадар сам пячнік, таму і грубкі – справа яго рук. Спраўнасць печак заўсёды пад пільным кантролем хатняга спецыяліста. У першую чаргу ратавальнікі наведваюць шматдзетныя сем'і і людзей паважанага ўзросту. Пенсіянер Эдуард Більдзюкевіч, у мінулым вадзіцель, ахвотна ўзгадвае, як быў добраахвотным дружыннікам у пажарнай часці. Мінулы вопыт не лішні і сёння – добра ведае, як рыхтавацца да зімы і карыстацца рускай печкай. Самае галоўнае – не сушыць адзенне на печцы і на працягу дзвюх гадзін пасля топкі не перакрываць засланку. Пажары ў прыватным сектары небяспечныя тым, што полымя можа пашкодзіць і суседскія будынкі. Толькі ў Маладзечанскім раёне сёлета ў агні загінулі 6 чалавек. Прадухіліць надзвычайныя сітуацыі нескладана – галоўнае памятаць элементарныя правілы бяспекі.