У прагнозах - дажджы з мокрым снегам і парывісты вецер. А ў пачатку наступнага тыдня - пагаршэнне ўмоў надвор'я. Месцамі ападкі моцныя. Дадалася работ і ў камунальнікаў. З надыходам халадоў лісце ападае яшчэ больш інтэнсіўна. Як прыбіраюць вуліцы і двары ў Мінску - рэпартаж Юліі Токар. Пад моцным напорам паветра гэты пыласос раздзімае лісця на два бакі. Так больш зручна і хутка зграбаць золата восені ў міні-горы. На маштабную ўборку апалай лістоты на вуліцы Мінска выехала ўся спецтэхніка. З-за рэзкіх халадоў стракаты дыван ў скверах і парках з кожным днём займае ўсё большую плошчу. Пятую восень запар Міхаіл Давыдок сустракае лістапад за рулём гэтага аўто. Сучасны камбайн дазваляе прыбіраць апалае лісце не толькі з большай плошчы, але і замяняе 9 рабочых з граблямі. Коўш адначасова заграбае, здрабняе і такім чынам у кузаў лісце трапляе няспынным патокам. Для бяспекі ў першую чаргу прыбраць неабходна лісце ўздоўж вуліц і пешаходных дарожак. А таксама ўваходы ў паркі і тэрыторыі ля атракцыёнаў. Напрыклад, у батанічным садзе таксама ладзяцца восеньскія работы. Супрацоўнікі ўцяпляюць хрызантэмы, ружы, маленькія саджанцы. Прычым для "штучнай зімовай коўдры" лепш падыходзіць лісце дуба. Для многіх восень - гэта пара творчых эксперыментаў. Майстар Вольга Хачкова падчас лістападу жывымі фарбамі "малюе" на тканіне. Вось так спрытна кляновыя лісты, кара дуба, чарніцы пакідаюць узоры на паланціне. Але ж напрыканцы восені ўборка лістоты не скончыцца. Калі зараз каштаны цалкам "распрануліся", дуб і вярба скідаць лісце будуць да зімы. А гэта значыць, што ў мастакоў яшчэ ёсць час на творчасць, а ў дворнікаў - праца ў самым разгары.