У Гомелі стварылі інкубатар маладзёжных ініцыятыў. Будучыя медыкі арганізавалі ў горадзе над Сожам дабрачынную акцыю і сталі донарамі-добраахвотнікамі. Побач – у палацава-паркавым ансамблі - унікальныя старадаўнія абразы, а на галоўнай плошчы абласнога цэнтра заззяла гарадская ёлка. Пра гэтыя і іншыя падзеі з жыцця паўднёвага рэгіёна Ганна Кавалёва. Рэсурсны цэнтр "Ступені" адкрыўся ў Гомелі. Ён стане месцам падтрымкі і ўвасаблення маладзёжных ініцыятыў. На гэтай тэрыторыі юныя гамяльчане змогуць сабрацца ў любы час, абмеркаваць новыя праекты і атрымаць парады экспертаў міжнароднага ўзроўню. Браць пад увагу плануюць любыя прапановы: ад развіцця інфраструктуры да паправак і дапаўненняў у заканадаўства. Гэта могуць быць творчыя, эканамічныя, спартыўныя і сацыяльна значныя праекты. Студэнты Гомельскага медуніверсітэта сталі донарамі-добраахвотнікамі. Каля двухсот будучых медыкаў вырашылі бясплатна здаць кроў. Такія дабрачынныя акцыі медыцынскай ВНУ і Гомельскай станцыі пералівання крыві праводзяцца апошнія 5 гадоў. Сёлета гэта не першы донарскі марафон. Акрамя студэнтаў, удзельнічаюць у ім і выкладчыкі, многія з якіх ужо ганаровыя донары. На працягу толькі гэтага года праект падтрымалі каля 700 чалавек. Унікальныя старадаўнія абразы дэманструюцца ў Гомельскім палацава-паркавым ансамблі. Выстава пад назвай "Светлае свята Нараджэння Хрыстовага" - гэта 25 ікон і каля 20 прадметаў культавага ліцця XV-XX стагоддзяў. Сярод іх - узоры веткаўскай, чачэрскай тэхнік, народнае пісьмо з выкарыстаннем залачэння і разьбы па дрэве. На палотнах - сюжэты, прысвечаныя Калядам, вобразы Божай Маці і Ісуса Хрыста. Многія абразы пабывалі на выставах Масквы, Мінска, Віцебска і ў краінах Еўропы. У Гомелі заззяла галоўная навагодняя ёлка. Па традыцыі яна заняла месца на найбуйнейшай плошчы абласнога цэнтра. Сёлетняя навінка - новае асвятленне. Замест звычайных лямпачак - піксельная гірлянда, якая кіруецца з дапамогай камп'ютарнай праграмы. У структуры - амаль 60 тысяч светлавых элементаў памерам з тэнісны мяч. Кожны з іх ззяе з пэўнай частатой. Разам светлавыя элементы ўтвараюць конусападобны экран, на які трансліруюцца мультыплікацыйныя малюнкі. Яны мяняюцца кожныя 5-10 секунд і сінхранізаваныя з музыкай. Таксама на галоўнай плошчы Гомеля з'явіліся новыя светлавыя фігуры і канструкцыі. Побач з імі разгарнуўся навагодні кірмаш.