Паскардзіцца на адсутнасць гарачай вады, паведаміць аб яме на дарозе ці перагарэлай лямпачцы ў пад’ездзе зараз можна ў адзін клік. Партал жыллёва-камунальнай гаспадаркі 115.бел набывае ўсё большую папулярнасць сярод насельніцтва. Так, у Гродне за чатыры месяцы працы інтэрнэт-рэсурса яго паслугамі скарысталіся больш за 20 тысяч чалавек. Як вырашаюць бытавыя праблемы пры дапамозе сучасных тэхналогій - у рэпартажы Юрыя Карняловіча. Пенсіянерка Галіна Сцепаненка жыве ў старым доме ў самым цэнтры Гродна. Прызнаецца: праблемы з ацяпленнем узнікаюць перыядычна. Толькі праблемы гэтыя са знакам плюс. У кватэры тэмпература не апускаецца ніжэй за 25 градусаў цяпла. Даведаўшыся пра інтэрнэт-партал ЖКГ 115.бел, жанчына пакінула сваю заяўку на адпаведным сайце.