Укралі веласіпед! Гарачы сезон наступіў для злачынцаў, што крадуць двухколыя. Сёлета з гэтай праблемай у міліцыю звярнуліся больш за 60 чалавек. Каб украсці веласіпед, патрэбныя лічаныя секунды. А надыход летняга сезона - гарачы перыяд для злачынцаў. Наталля Кузьміцкая сабрала парады вопытных велааматараў і даведалася, як засцерагчы свой двухколавы транспарт ад крадзяжу. Вось мужчына заходзіць у пад'езд, а вось ён жа літаральна праз хвіліну хутка пакідае ўжо, зразумела, месца злачынства. І такіх відэаролікаў у Сетцы даволі шмат. Менавіта гэты від крадзяжоў, асабліва летам, сярод самых распаўсюджаных. Дарагая тэхніка, якую на доўгі час пакідаюць без нагляду ў адным і тым жа месцы, абавязкова рана ці позна прыцягвае ўвагу злачынцаў. Больш бяспечна ўсё ж пакідаць двухколавы транспарт на велапаркінгу ці ў кватэры. Тым жа, хто выкарыстоўвае веласіпед не толькі ў выхадныя для невялічкай прагулкі, а штодня ў якасці паўнавартаснага транспартнага сродку, прафесіяналы раяць не эканоміць на ахоўных сістэмах. На жаль, любы надзейны сродак супраць выкрадання імкліва страчвае актуальнасць і прайграе вынаходлівасці злодзея. Калі двухколавы ўсё ж выкралі, першае, што неабходна зрабіць, – напісаць заяву ў міліцыю. Менавіта тэрміновы зварот у большасці выпадкаў дазваляе хутка знайсці веласіпед, па-другое, можна паспрабаваць адшукаць яго на гандлёвых анлайн-пляцоўках. Звычайна веласіпеды крадуць для наступнага перапродажу.